Relasyon ni Cesar kay Sandra, ‘di tago

IYONG sa case naman nina Sandra Seifert at Cesar Montano, alam na ng mga tao iyan dahil napag-usapan na iyan noon pa man. Hindi ba nakunan pa nga sila ng picture habang nasa isang eroplano papunta sa US? Doon naman nanganak si Sandra, na pinangalagaan ng isang pastor ng Seventh Day Adventist. Noong maipanganak na si Coco, nagbalik na sa Pilipinas si Sandra.

Nagpatuloy siya sa kanyang ministry sa kanilang relihiyon, in fact kamakailan ay may post pa nga sa isang eskuwelahan ng mga Adventists na naging guest pa sina Cesar at Sandra. Ibig sabihin, may mutual understanding naman sa kanila, kahit na sinasabing ang live-in partner ni Cesar si Kath (Socorro Angeles).

Ang sinasabi lang ni Sandra, talagang sinisikap niyang mabigyan ng higit na panahon ang anak nilang si Coco, dahil bihira na nga niyong makasama ang amang si Cesar, gusto naman niyang maibigay ang lahat ng kanyang panahon, bukod siyempre sa kanyang religious ministry na kailangang gampanan.

Nakatatawa lang na nitong mga nakaraang araw ay may naglalabas ng lahat ng mga istoryang iyan na akala mo kontrobersiyal na pangyayari ganoong hindi naman. May mga bagay na hindi nila binuksan sa publiko at karapatan naman nila iyan kahit na sabihing mga public figure sila. Ang mahalaga may unawaan sila kung ano ang katayuan sa buhay ng bawat isa. Hindi naman nagkakagulo ang mga nanay ng kanyang mga anak, kaya walang problema si Cesar doon.

HATAWAN
ni Ed de Leon