HATAW! D'yaryo ng Bayan hatawtabloid.com
PATAY sa enkuwentro ang dalawang hinihinalang ‘gun runner’ habang nagkalat ang libo-libong perang pinaniniwalaang pinagbentahan ng armas, nang magkabarilan nitong Miyerkoles ng madaling araw, 28 Oktubre, sa Sitio Kawayan Farm, sa bayan ng Pililla, lalawigan ng Rizal.
Kinilala ni P/Maj. Joel Custodio hepe ng pulisya ang isa sa namatay base sa identification card na nakuha sa kaniyang katawan, na si Jake Pongal Anden, nasa hustong gulang.
Ayon sa mga awtoridad, dakong 3:15 am kahapon, nang paputukan ng dalawang suspek ang mga tauhan ng Pililla PNP at Anti-Carnapping Group na nauwi sa ilang minutong bakbakan ng putok sa Sitio Kawayan Farm, Barangay Halayhayin, sa nabanggit na bayan.
Nauna rito, ayon kay Custodio na nagsagawa sila ng operasyon kasama ang mga operatiba ng AKG dahil magkakaroon umano ng bentahan ng armas mula sa mga suspek at asset ng pulisya.
Hawak ng pulis ang ibinentang baril na kalibre .45 at binibilang ng isa sa suspek ang P30,000 peso bills nang makatunog na alagad ng batas ang katransaksiyon.
Dito nagkaroon ng barilan na agarang ikinamatay ng mga suspek.
Dinala sa pinakamalapit na punerarya ang mga bangkay para isailalim sa awtopsiya habang nagsasagawa ng follow-up operation ang mga operatiba upang matukoy ang grupong kanilang kinaaaniban.
Edwin Moreno
