HATAW! D'yaryo ng Bayan hatawtabloid.com
WALA nang nakakibo nang mag-post si Sarah Geronimo ng picture ng isang kandila na sinindihan niya at itinirik sa kanilang bintana, na sinasabi niyang ginawa nila ni Matteo Guidicelli bilang suporta sa ABS-CBN. Nauna riyan, ang daming putak nang putak na walang ginagawa si Sarah ganoong nakinabang naman siya nang husto sa ABS-CBN.
Kung sa bagay, may mga basher pa rin na nagsabing “nagtirik din lang ng kandila, bakit naman esperma lang ang ginamit.” Eh ano ba ang gusto ninyong itirik ni Sarah sa kanilang bintana, iyong kandilang kagaya ng ginagamit sa Chinese cemetery?
Hindi rin mahalaga ang kandilang itinirik ni Sarah. Ang mahalaga ay iyong intensiyon ng kanyang pagtitirik ng kandila, malaki man iyan o maliit. Ang mahalaga riyan ay ang kanyang iniukol na dasal kasabay ng pagtitirik ng kandila. Sa ngayon masasabi nga siguro natin na Diyos lang ang makatutulong sa ABS-CBN, at kung ganyan nga mas mahalaga iyong isang maikling panalangin kaysa mahabang pakikipagtalakan sa gitna ng kalye.
Artista ka, magtatatalak ka sa gitna ng kalye, natural makakatawag ka ng pansin. Marami ang lalapit at “manonood” sa iyo. Hindi ibig sabihin pinakikinggan nila ang sinasabi mo, nanonood sila. At ano ang nangyayari, inilalagay mo pa sa alanganing sitwasyon ang kapwa mo, dahil nawawala ang personal distancing. Siksikan sila sa panonood sa iyo eh.
Kaya nga ibinabawal iyang mass gatherings eh, dahil talagang delikado ang Covid, at sa ganoong sitwasyon, alam mo na kung sino ang carrier ng virus o hindi? At saka alam naman natin ang ugali niyang si Sarah eh. Sa kahit na anong sitwasyon, kalmado lang iyan. Hindi iyan ang tipong magtatatalak talaga sa kalye.
HATAWAN
ni Ed de Leon
