HATAW! D'yaryo ng Bayan hatawtabloid.com
POSITIBONG tumutunog pa rin ang magandang reputasyon ng mga Pinoy sa ibang bansa kahit walang kinalaman sa Covid-19.
Sa England (na kilala rin bilang Great Britain at United Kingdom) hinangaan ang Pinoy dancers na sina Ezekiel Vargas at Carl Magan sa performance nila sa audition sa Britain’s Got Talent.
Hinangaan sila sa nakasisigla at acrobatic na pagsasayaw ng sikat na kanta ni Tina Turner na, Proud Mary.
Pinalakpakan din sila nang husto ng live audience dahil sa mabilis na pagpapalit-palit nila ng costume habang nagsasayaw. Nag-standing ovation (tumayo bilang sinyal ng paghanga) ang audience.
May live audience sa audition na ‘yon na dahil idinaos ‘yon sa isang napakalaking studio bago pa kumalat ang pandemic na Covid-19. (Gaya ng America’s Got Talent, napaka-advanced ng taping ng Britain Got Talent).
Parehong lalaki sina Exequiel at Carl, pero ang isa sa kanila ay sumayaw bilang babae na siyang binubuhat-buhat, binabali-baliktad, pinaiikot-ikot sa pagsasayaw nila. At ‘yon ay si Carl.
Maaaring ‘yung sumasayaw bilang babae ay bading. Pero sa mga website report na naglabasan simula noong May 2, wala ni isa man sa mga ulat na nagsabing bading ang isa sa kanila.
Kahanga-hanga na ang pinahalagahan ng lahat ng mga ulat ay ang kamangha-mangha nilang pagsasayaw at pagpapalit ng costumes na hinahablot-hablot lang para matanggal at matambad ang isa pang costume. May isa pang punto na kumembot-kembot ang gumaganap na babae at unti-unting may tumaas na masikip na rainbow tube dress mula sa laylayan ng kasalukuyan n’yang suot na damit.
Para sa gustong mapanood ang kamangha-manghang pagsasayaw nina Exequiel at Carl, matutunghayan n’yo ito sa website ng ABS-CBN at ng dyaryong Inquirer.
Tinanggap ng apat na hurado ng talent contest TV show ang dalawang Pinoy para maging contestants. Kabilang sa apat ang sikat na sikat pero may reputasyong mataray na Simon Cowell. ‘Yung tatlo pa ay sina Amanda Holden, Alesha Dixon, at David Walliams.
Hindi binanggit sa mga website report kung pumunta sa England ang dalawang Pinoy mula sa Pilipinas para sumali sa talent contest o matagal na silang naninirahan sa England. Pero sa alinman sa website reports, ‘di sila tinawag na “British-Filipino.” Iniulat sila bilang mga Pinoy. Hindi pa inilalabas ang mga detalye sa kanilang dalawa.
KITANG-KITA KO!
ni Danny Vibas
