FIBA 3×3 Asia Super Quest, gaganapin sa Ph

FILIPINAS ang magiging tahanan ng kauna-unahang FIBA 3×3 Asia-Pacific Super Quest na nakatakda sa darating na Abril.

Katuwang ang Samahang Basketbol ng Pilipinas, inianun­siyo ito ni Chooks-to-Go owner Ronald Mascariñas kamakala­wa ng gabi sa isang media launch ng makasaysayang torneo na tatawaging Chooks-to-Go 3×3 Asia-Pacific Super Quest. Nakuha ng bansa ang hosting rights ng naturang event matapos mapabilib ang FIBA sa pagdaraos ng Filipinas ng FIBA 3×3 World Cup noong nakara­ang taon sa Philippine Arena sa Bocaue, Bulacan.

Nakadagdag din sa pagka­mangha ng FIBA ang inilunsad na Chooks Pilipinas 3×3 league na kauna-unahang organisado at FIBA-registered na 3×3 league sa buong bansa.

“After last year’s success of the FIBA 3×3 World Cup organized by the SBP, the initiative of Chooks-to-Go to set up a tournament with inter­national teams from Asia-Pacific qualifying to the FIBA 3×3 World Tour is excellent news,” ani FIBA 3×3 managing director Alex Sanchez.

“This underpins the effort of Chooks-to-go in organizing dozens of local 3×3 events and will accelerate the development of 3×3 in Philippines. So, there is no reason why Philippines cannot have successful teams playing at World Tour, considering the depth of talent and love for the game in the country.”

Wala pang pinal na bilang pero inaasahan ng FIBA na hanggang sa 16 koponan ang sasali sa naturang torneo sa pangunguna ng reigning World Cup champion at top ranked 3×3 country ngayon na Serbia kasama ang no.1 3×3 player na si Dusan Bulut.

Bilang host country, mabibiyaan ang Filipinas ng dalawang team sa 16 koponan ng Super Quest na ang top three ay makapapasok sa FIBA 3×3 World Tour.

Isa ang Super Quest sa hakbang ng SBP at ng Chooks-to-Go na makalikom ng sapat na puntos upang makaabante sa 2020 Tokyo Olympics kung saan ang 3×3 ay magiging medal sporting event na sa unang pagkakataon sa kasaysayan.  

(JOHN BRYAN ULANDAY)