‘DEAD ON ARRIVAL’ o wala nang oras sa Senado para talakayin ang charter change o pagbabago ng Saligang Batas tulad ng isinusulong ng Kamara de Representantes.
Ito ang magkakahalintulad na pahayag ng ilang senador makaraan ilabas sa Kongreso ang panibagong federal charter draft na nagsasaad na hindi si Vice President Leni Robredo ang maaaring pumalit kay Pangulong Rodrigo Duterte kundi ang Senate President.
Ayon kay Senate Minority Leader Franklin Drilon, ‘dead on arrival’ na sa Senado ang usapin sa cha-cha.
Paliwanag ni Drilon, panahon na ng budget deliberations at ilang araw na lamang ay filing na ng certificate of candidacy ng re-electionist senators.
Iginiit ni Drilon, napagkasunduan nilang mga senador na hihintayin muna nila ang committee report ng Senate committee on constitutional amendments and revision of codes and laws, na pinamumunuan ni Senador Francis Kiko Pangilinan.
Sa panig ni Senate Majority Leader Juan Miguel Zubiri, naniniwala siyang wala nang oras ang Senado at gagahulin na sila para talakayin pa ang charter change
Nauna nang binatikos ni opposition Senator Francis “Kiko” Pangilinan ang mga kongresista na nagpanukala ng panibagong draft para sa ikakasang charter change.
Ayon kay Pangilinan, tila pinaglalaruan na lamang ng ilang mga mambabatas ang Konstitusyon.
Imbes tumulong sa paghahanap ng solusyon sa mga suliranin sa bansa ay pagpapahaba ng termino at pagkapit sa poder ang kanilang inaatupag.
Dahil dito, mensahe ng mambabatas sa mga naturang kongresista na mahiya sa taong bayan lalo’t hindi na magkandaugaga ang ang mahihirap kung saan at paano kukuha ng pangkain at pasahe sa araw-araw dahil sa pagtaas ng inflation rate sa bansa.
ni CYNTHIA MARTIN