Palasyo dumistansiya sa No-El ni Alvarez

DUMISTANSYA ang Palasyo sa panukala ni House Speaker Pantaleon Alvarez na iliban ang midterm elections sa susunod na taon.

Sinabi ni Presidential Spokesman Harry Roque, nananatili ang pani­nindigan ni Pangulong Rodrigo Duterte na ipatupad ang nakasaad sa 1987 Constitution na idaos ang halalan sa nakatakdang petsa.

“Gaya nang paulit-ulit na nating sinabi, ang Presidente po ang tagapagpatupad ng ating Saligang Batas; hanggang hindi po mababago ang petsa ng halalan na nakasaad sa ating Sali­gang Batas, ipatutupad po ‘yan ng Presidente – matutuloy po ang elek­siyon ng 2019,” ayon kay Roque sa press briefing kahapon sa Palasyo.

Ang tanging posibi­lidad na maunsyami ang 2019 midterm elections ay kapag naratipika nang maaga ang panu­kalang Federal Constitu­tion, ibig sabihin ay wala nang bisa ang 1987 Constitution.

“Ang only possibility po e kung ma-ratify nang mas maaga itong pro­posed new constitution in which case na ‘87 Con­stitution would cease to have legal effect ‘no, pero habang wala pa pong bagong Saligang Batas sisiguradohin po ng Presidente magkaka-eleksiyon,” ani Roque.

Binigyan diin ni Roque, ang desisyon kung itutuloy o hindi ang eleksiyon ay nasa kamay ng Ehekutibo at hindi ng Kongreso.

 (ROSE NOVENARIO)