Tarps, billboards, posters ipinababaklas ni SAP Bong Go

IPINATATANGGAL na ni Special Assistant to the President (SAP) Christo­pher “Bong” Go sa kani­yang mga tagasuporta ang mga nakapaskil na posters, tarpaulin at billboards ng kanyang mukha, ilan sa mga ito ay nanghihikayat na tu­makbo siya sa 2019 elections.

Ito ay sa harap nang patuloy na pagbatikos kay Go dahil sa umano’y maaga niyang panga­ngampanya, na nakikita mula sa mga nakapaskil na billboards at tarpau­lin.

Binatikos ng mga kritiko ng administrasyon, partikular ni Renato Reyes ng Bagong Alyansang Makabayan (Bayan), ang billboards ni Go at sinabing humihingi uma­no ang opisiyal ng pondo sa kaniyang mga taga­suporta para sa maagang kampanya.

Gayonpaman, iginiit ni Go na wala siyang kinalaman sa nasabing mga billboard at tarpau­lins.

Binigyang diin ng kalihim na hindi siya katulad ng ibang grupo na puwersahang nanghi­hingi ng pondo sa mga indibiduwal o nego­s-yante para maisulong ang kani­lang pansariling interes.

Kasabay nito ang paggiit ni Go na hindi siya intresado sa pagtakbo dahil marami aniyang trabaho pa ang kaila­ngang gawin.

(ROSE NOVENARIO)