HATAW! D'yaryo ng Bayan hatawtabloid.com
SINILAT ng Batang Gilas ang paboritong Egypt, 70-79 para sa una nitong panalo kahapon sa 13th-16th classification match ng 2018 FIBA Under-17 World Cup sa Techonological University Stadium sa Sta. Fe, Argentina kahapon ng umaga.
Matapos lumamang ng 20 puntos sa unang bahagi, tumirik ang Batang Gilas sa dulo ngunit buenas na nasa panig nila ang orasan upang maka-eskapo pa rin tangan ang panalo.
Binura ng Egypt ang 19-39 kalamangan ng Batang Gilas nang lumapit hanggang 66-67 sa huling 55 segundo matapos ang dalawang free throws ni Omar Tarek Samir.
Ngunit tulad ng inaasahan, binuhat ng 7’1 na si Kai Sotto ang Batang Gilas nang magpasok ng 3 sa apat na free throws bunsod ng desperadong fouls ng Egypt upang makahinga nang maluwag ang koponan sa 70-66 abanse.
Tiningnan ng Batang Gilas na pumasok ang tres ni Mazen Ibrahim sa pagtunog ng huling silbato para sa pinal na 70-69 tala.
Bunsod nito, nakalasap sa wakas ng tagumpay ang Batang Gilas matapos mabigo sa unang limang salang.
Namayani si Sotto para sa Batang Gilas sa kinayod na double-double na 28 puntos at 17 rebounds sahog pa ang 3 tapal.
Solido ang ambag ng kanyang mga kasangga sa pangunguna ni Gerry Abadiano na may 15 puntos gayundin sina Forthsky Padrigao at Raven Cortez na may tig-10 puntos.
Ika-34 sa buong mundo, hindi nakabulag ang Batang Gilas sa group phase campaign nito sa Pool D nang yumukod sa France, Croatia at Argentina.
Sa Round of 16 ay natambakan din ang Batang Gilas ng Canada, 62-102 upang mahulog sa classification matches.
May tsansa sana ang Batang Gilas sa mas mataas na puwesto sa 9th-12th place ngunit muling nabaon ng African U-17 titlist na Mali, 59-95.
Susubukang selyohan ng Batang Gilas ang ika-13 puwesto kontra sa Oceania powerhouse na New Zealand ngayong madaling araw.
ni John Bryan Ulanday
