La Salle kampeon sa Taiwan

MINASAKER ng UAAP champion La Salle ang Universite de Lyon, 93-74 ng France upang maghari sa BLIA Cup University Basketball Tournament sa Kaohsiung, Taiwan.

Kumayod si Ben Mbala ng 26 points, 13 rebounds at apat na blocks habang kumana sina Aljun Melecio at rookie Gabe Capacio ng 19 at 12 markers ayon sa pagkakasunod para sa Green Archers na kinumpleto ang five-game sweep sa tournament.

Si Ricci Rivero na may 10 puntos, apat na assists at tatlong steals ang tinanghal na Most Valuable Player.

Sumali ang La Salle sa nasabing tournament bilang paghahanda sa UAAP men’s basketball wars na magsisimula sa susunod na buwan.

“Faith not Fate,” saad ni coach Aldin Ayo sa kanyang Twitter account.

Tinaob ng La Salle ang Chie Hsin University, top collegiate team sa Taiwan sa kanilang unang laro, 110-103 bago tinalbos ang Vanguard University, 84-81, sa overtime.

Pinadapa rin ng Green Archers ang Chung Chou University, 97-74 para sa kanilang three-game sweep sa preliminaries.

Sumampa sa Finals ang DLSU noong Sabado matapos paluhurin ang Tsinghua University, 103-95.

ni ARABELA PRINCESS DAWA