Payo ng Pari sa pagbanat ng Superstar sa Katoliko — Ipagdasal si Nora Aunor

MAY nagpadala sa amin ng e-mail na nagsasabing si Nora Aunor pala ay humingi ng dispensa sa Iglesia ni Cristo, dahil marami sa mga miyembro niyon ay na-offend, nang sa isang pagtitipon ng grupong Ang Dating Daan ay tinawag niya iyong Iglesia ni Manalo. Iyong feeling namin, hindi lang iyong pagtawag niyang Iglesia ni Manalo ang naka-offend doon kundi iyong sinabi niyang mga maling practice na hindi niya nagustuhan nang minsang isinama siya sa pagsamba.

Binanatan nang husto ng mga kasapi ng Iglesia si Nora, kabilang na ang isang napakatinding salita na ”walang kumalaban sa Iglesia na nagtagumpay”. Kaya siguro humingi ng dispensa agad si Aunor.

Pero sabi ng nagpadala ng e-mail, bakit daw hindi nag-react ang mga Katoliko, samantalang binatikos din ni Nora ang pananampalatayang Katoliko at ang mga pari?

Ang sagot po ay simple lang. Hindi pinansin ng mga Katoliko ang mga sinabi ni Nora. Una, siguro noong mga panahong iyon ang mga Katoliko ay busy sa panonood ng prusisyon ng Nazareno sa Quiapo. Eh iyong prusisyon palabas sa halos lahat ng mga TV channel. Iyon namang sinabi ni Nora, lumabas lang sa UNTV 37. Isa pa, siguro nga sanay na kasi ang karamihan sa mga comment na ganyan ni Nora.

Ano rin ang sinabi niya laban sa ABS-CBN at kay Charo Santos noon? Ano ang sinabi niya nang umalis siya sa Channel 5? Siguro nga naisip din naman niya na hindi naman siya sinusuportahan ng mga Katoliko kaya ganoon ang nasabi niya. Isa pa, bakit mo naman papansinin pa? Iyong simbahang Katoliko ay nasa Pilipinas na sa loob ng mahigit na 450 taon. Eh si Nora nga wala na ngayon eh.

Kung siguro isang malaking personality iyan na kagaya ni Presidente Digong, o sino mang pinaniniwalaan ng mamamayang Filipino, baka sakaling mag-react pa ang simbahan. Pero kung si Nora naman bakit pa?

Sabi nga ng isang paring kaibigan namin, huwag na kayong mag-react. Ipagdasal na lang si Aunor, na sana’y bumuti ang kanyang buhay at magtagumpay naman siya sa kanyang mithiin. Hindi ganyang tingnan nga ninyo, wala nang nanood ng kanyang pelikula kaya pinakakulelat sa festival, wala pa siyang nakuhang award kahit na isa. Hindi rin siya binigyan ng ratings man lang ng CEB.

HATAWAN – Ed de Leon