Melai at Pokwang, nagkasira

NAGBABADYANG mauwi sa hidwaan ang pagkakaibigan nina Wilma (Pokwang) at Maricel (Melai Cantiveros) dahil nalalapit nang malaman ng huli ang pagsira ng kanyang kaibigan sa binitawang pangako nito sa Kapamilya afternoon series na We Will Survive.

Ilang taon na ang lumipas ngunit matindi pa rin ang hinanakit ni Maricel  kay Pocholo (Carlo Aquino) matapos siyang ilang beses lokohin at paasahin. Kaya naman lubos ang nararamdamang galit sa panahong nadiskubre niyang hindi tinupad ni Wilma ang kanilang usapan na huwag hayaan si Pocholo na maging parte ng buhay ng kanyang anak.

At dahil dito, magiging buo ang desisyon ni Maricel na ilayo si Jude (John Steven De Guzman) sa kanyang ama at tuluyan nang putulin ang kanilang ugnayan bagamat labag sa kalooban ng kanyang anak.

Marami pang dapat abangan kaya tutukan ang teleseryeng nagpapakita na gaano man kapangit ang mundo, gaganda ang buhay basta’t magkasama tayo, ang We Will Survive tuwing gabi, bago mag-TV Patrol sa ABS-CBN o sa ABS-CBN HD (SkyCable ch 167).

 ( Roldan Castro )