HATAW! D'yaryo ng Bayan hatawtabloid.com
SA patuloy na pagsisikap tungo sa mas inklusibong mundo ng palakasan, pinalawig ng Special Olympics Pilipinas (SOP) ang pakikipagtulungan nito sa Philippine Sports Commission (PSC), na lalong nagpapatibay sa kanilang layunin na bigyang-kapangyarihan ang mga Persons with Intellectual Disabilities (PIDs) sa pamamagitan ng tuloy-tuloy na access sa pagsasanay, kompetisyon, at mga programang pangkaunlaran.
Isang mahalagang bahagi ng kolaborasyong ito ang buong suporta ng PSC sa pagho-host ng bansa ng Special Olympics Asia Pacific 3×3 Basketball Tournament, na gaganapin mula Disyembre 5 hanggang 9. Inaasahang dadalo ang humigit-kumulang 300 delegado mula sa 10 bansa sa rehiyong Asia-Pacific, na siyang unang pagkakataon na magho-host ang Pilipinas ng nasabing kompetisyon na mayroong tradisyunal (nilalaro ng PIDs) at unified (kasama ang mga atletang walang kapansanan) na dibisyon.
“Ang SOP ay isang NGO, bahagi kami ng global organization na Special Olympics, at ang aming pangako ay magbigay ng buong-taong sports fitness training at kompetisyon para sa mga taong may intellectual disabilities,” ayon kay AA Galicia, National Director ng SOP, sa ginanap na Usapang Sports forum ng Tabloids Organization in Philippine Sports (TOPS) sa Rizal Memorial Coliseum.
Binigyang-diin naman ni SOP Chairperson at tatlong beses na Swimming Olympian na si Akiko Thomson-Guevara ang patuloy na pagsisikap ng organisasyon na isulong ang unified sports—kung saan sabay na naglalaro ang mga atletang meron at walang intellectual disabilities.
“Kami ay nakikilahok at nagho-host ng mga training, kompetisyon, at torneo buong taon. Noong nakaraang taon, nagkaroon kami ng all-women’s football team na unified, at nais ko ring iulat na ang tournament na gaganapin ay unified basketball—hindi lamang PIDs ang nasa court, kundi kasama rin nila sa iisang koponan ang mga typical na atleta. Napakalakas ng mensaheng hatid nito,” dagdag ni Guevara.
Magpapadala ang Pilipinas ng matibay na delegasyon na binubuo ng walong koponan—apat sa men’s division at apat sa women’s division—para sa nalalapit na Special Olympics Asia Pacific (SOAP) 3×3 Basketball Tournament. Ang pagpili sa pambansang koponan ay isasagawa sa pamamagitan ng tryouts na gaganapin ngayong Abril sa University of Makati.
Nagpahayag din ang SOP ng pasasalamat sa kanilang mga pangunahing katuwang, kabilang ang Department of Education (DepEd), iba’t ibang local government units, at mga pribadong sponsor, sa patuloy na suporta sa pagpapalawak ng oportunidad para sa mga Pilipinong may intellectual disabilities sa larangan ng sports.
Sa hinaharap, ibinahagi rin ng SOP ang kanilang plano na magpadala ng buong pambansang delegasyon sa 2027 Special Olympics World Games na gaganapin sa Santiago, Chile.
“Para sa kanila, napakahalaga ng event na ito. Ang mga atleta ay naghahanda lingguhan, tuwing weekend, buong taon. Handa sila para sa elimination at selection rounds upang maipakita sa mundo na tayong mga Pilipino, kahit may intellectual at developmental disabilities, ay kaya nating magtagumpay—oo, kaya natin,” pagtatapos ni Galicia. (HNT)
