Suspetsosong ‘timing’ ng 18 ex-marines pinuna ng solons

ni Gerry Baldo

KINUWESTIYON ng ilang lider ng Kamara ang timing ng mga paratang ng mga taong nagpapakilalang dating Marines, at sinabing tila may layunin itong guluhin at siraan ang nalalapit na impeachment hearings laban kay Vice President Sara Duterte.

Ayon kay Manila Representative Joel Chua, kahina-hinala ang paglabas ng mga alegasyon sa panahong magsisimula ang pagdinig ng Justice Committee. Aniya, tila layunin nitong siraan ang mga miyembro ng Quad Committee at ang komiteng hahawak sa impeachment proceedings.

Sinabi ni Chua na kanilang pag-uusapan kung may sapat na batayan upang magsampa ng kaso laban sa mga nag-akusa.

Samantala, iginiit ni Deputy Speaker Paolo Ortega V na walang katotohanan ang mga paratang at hindi dapat palakihin ang mga isyung walang ebidensiya. Aniya, dapat manatili sa katotohanan at responsableng pahayag ang pampublikong diskurso.

Nagpahayag din si House Committee on Human Rights Chair Bienvenido Abante, Jr. ng mariing pagtanggi sa alegasyong tumanggap siya ng maleta ng pera. Aniya, ito ay gawa-gawa lamang at bahagi ng politika, lalo na dahil sa kanyang matatag na paninindigan laban sa umano’y extrajudicial killings noong administrasyon ni dating Pangulong Rodrigo Duterte.

Iginiit ni Abante na maninindigan siya sa kanyang prinsipyo at hindi matitinag ng mga gawa-gawang akusasyon.

Samantala, inilinaw ni Iloilo City Representative Julienne Baronda na hindi nabanggit ang kanyang pangalan sa kahit anong imbestigasyon kaugnay ng flood control scam. Aniya, mas pipiliin niyang ipagdasal na manaig ang katotohanan kaysa patulan ang mga maling paratang.

Sa kabila ng mga isyu, nananatiling nakatuon ang Kamara sa paghahanda para sa impeachment hearings, habang binibigyang-diin ng mga mambabatas ang kahalagahan ng katotohanan at wastong proseso sa ilalim ng batas.