HATAW! D'yaryo ng Bayan hatawtabloid.com
ISANG nakatagong shabu laboratory ang natuklasan ng mga tauhan ng Philippine Drug Enforcement Agency (PDEA) Cavite Provincial Office, PDEA Regional Office-National Capital Region-Northern District Office, at Valenzuela City Police Station sa pamamagitan ng isang buybust operation sa isang high value drug personality sa Barangay Veinte Reales, Valenzuela City.
Batay sa ulat ng mga awtoridad, dakong 4:15 ng madaling araw kahapon nang isagawa ang buybust operation na nagresulta sa pagkadakip kay alyas John, 30 anyos, ng Cubao, Quezon City.
Nakompiska mula sa suspek ang nasa 500 gramo ng shabu na nagkakahalaga ng P1,500,000 at buybust money.
Sa pagkakadakip kay John, nadiskubre ang clandestine drug laboratory na sinabing matagal nang nag-o-operate sa lugar.
Inaalam ng pulisya ang posibleng lawak ng operasyon ng nasabing shabu lab at kung sino ang may-ari ng lugar.
Nahaharap ang suspek sa kasong paglabag sa Section 5 (Sale of Dangerous Drugs), Section 8 (Manufacture of dangerous Drugs), Section 11 (Possession of Dangerous Drugs) Article II of Republic Act No. 9165 o Comprehensive Dangerous Drugs Act of 2002.
