Warehouse sa Marikina tinupok ng apoy

TINUPOK ng malaking apoy ang isang warehouse sa Brgy. Malanday, sa lungsod ng Marikina, nitong Miyerkoles ng umaga, 12 Pebrero.

Binalot ng makapal at maitim na usok ang lugar na nagpahirap sa mga bombero para maapula ito.

Hindi bababa sa 100 truck ng bombero ang idineploy ng Bureau of Fire Protection (BFP) upang magresponde sa sunog na umakyat hanggang sa ikatlong alarma.

Idineklarang under control ang sunog dakong 2:42 ng hapon at walang naiulat na nasaktan.

Ayon sa security head ng kompanyang nagmamay-ari ng warehouse, naglalaman ito ng mga galvanized iron pipes at mga metro ng tubig.

Patuloy ang imbestigasyon ng mga awtoridad upang matukoy ang sanhi ng sunog.