SB 19 Stell deadma sa mga nambu-bully — proud ako sa itsura ko noon

MATABIL
ni John Fontanilla

HINDI apektado at deadma lang ang member ng SB19 na si Stell Ajero sa mga nagkakalat ng kanyang mga lumang litrato noong hindi pa siya sumasailalim sa cosmetic procedures.

Aminado si Stell na may mga tao talagang ayaw tumigil sa pambu-bully gamit ang kanyang mga old pic, kaya naman sa kanyang Tiktok Live ay nagsalita na ito ng nararamdaman.

Ani Stell, “‘Pag nag-o-open ako ng Facebook talagang nakikita ko, specially ‘yung picture nga na kumakalat. Ginagamit talaga ng lahat to make fun of me. Ginagamit nila kahit saan, memes, sa mga kung ano-anong bagay, kinu-compare nila sa ibang artists, ibang P-pop idols. Tapos sinasabi nila maasim.”

Dagdag pa ni Stell, hindi niya ikinahihiya ang dati niyang itsura dahil part ‘yun ng past niya at walang dapat ikahiya roon.

“Ako, hindi naman ako nasasaktan. Unang-una sa lahat, proud ako roon sa photo na ‘yon. 

“Proud ako kasi kahit anong gawin natin, part pa rin siya ng past ko. And proud ako roon kasi ‘yun ‘yung reason bakit ako nandito ngayon.

“Mayroong ganoong klaseng Stell kaya mayroong Stell na ganito ngayon.

“Hayaan ko na lang kung sumaya siya sa ginawa niya. Thankful ako dahil ako ‘yung reason bakit siya masaya,” wika pa ni Stell.

Sa ngayon ay walang dapat ipagmaasim si Stell dahil siksik at liglig ang blessings na dumarating sa kanya at sa kanilang grupong SB19.