HATAW! D'yaryo ng Bayan hatawtabloid.com
HATAWAN
ni Ed de Leon
NAGHARAP ng petisyon si Jhong Hilario sa Makati RTC na kilalanin na ang divorce sa kanyang asawang foreigner. Nag-asawa na pala noon si Jhong pero nagawa niyang itago iyon sa mata ng publiko. Hindi naman pala sila halos nagsama kaya nga hindi sila nagkaroon ng anak. Nagkakilala raw sila nang magkasama sa produksiyon ng Miss Saigon noon sa Pilipinas na ang babae ay isang wardrobe mistress sa nasabing palabas.
Dahil hindi naman sila nakapagsama at hindi nakasunod si Jhong sa Norway kung nasaan ang asawa niya, nag-divorce na lang sila. Pero hindi ganoon kadali ang paghihiwalay. Dito kasi sa Pilipinas ay wala tayong divorce bagama’t kinilala ng batas ang divorce ng isang Filipino at isang dayuhan sa bansang may divorce.
Kailangang utusan ng hukuman ang civil registrar ng Makati na nagkasal sa kanila na alisin na sa kanilang record ang kasal na iyon dahil nag-divorce na ang mag-asawa. Kasabay niyon kailangan din ng court order para alisin iyon ng PSA sa kanilang listahan at bigyan si Jhong ng CENOMAR na tiyak na hahanapin sa kanya kung pakakasal siyang muli.
May live-in partner na ngayon si Jhong kung kanino siya may isang anak at gusto niyang pakasalan na rin iyon tutal matagal na siyang divorce sa una niyang pinakasalan.
