Heart magdadahan-dahan muna sa trabaho

HATAWAN
ni Ed de Leon

NAGDESISYON ngayon si Heart Evangelista na kailangan nga raw siguro siyang mag-slow down sa kanyang mga ginagawa para mapag-isipang mabuti at mabigyang panahon ang iba pang mga pangarap niya sa buhay,

Labis ang kalungkutan ni Heart nang tumigil umano ang pagtibok ng puso ng isang inaasahan nilang anak na lalaki na tinawag niyang Francisco. Hindi naman buntis si Heart, hindi siya nakunan. Pero pinadaan nila iyon sa IVF na ang mga semilya ay nagmula rin naman sa kanya at sa asawang si Senador Chiz Escudero. Kung nabuo sana iyon, maaaring ipasok sa sinapupunan ng ibang babae para siyang magsilang lamang ng kanilang tunay na anak. Hindi iyon magiging anak ng babaeng magdadala sa sinapupunan dahil hindi naman niya dugo ang dumaloy doon. Natural na anak pa rin iyon nina Heart at Chiz kahit na kunin pa ang DNA niyon.

Hindi lang ngayon iyan, tila iyan na ang pang-apat na pagtatangka nina Heart at Chiz na nabigo, pero hindi naman sila nawawalan ng pag-asa. Malaki nga ang gastos, milyong piso ang kailangan basta nagsagawa ng IVF pero kung makakayanan naman nila ang gastos bakit nga ba hindi nila susubukang magkaroon ng isang anak na talagang sa kanila?

Siguro nga kailangan lamang ng pahinga ni Heart at hindi magtatagal mangyayari rin ang matagal na nilang hinihintay.