Ka-loveteam ni Atasha hanap ng E.A.T; mala-Aga o Alden dapat ang hitsura

HATAWAN
ni Ed de Leon

AYAN na kumikilos na ang E.A.T.. Naghahanap na sila ng isang lalaking “cute” at sinasabing maaaring mag-audition ang mga iyon sa TV5 kung hapon. 

“Cute” ang hinahanap nila, siguro isang mala-Alden Richards, na siya nilang itatambal marahil sa magandang anak ni Aga Muhlach na si Atasha na ngayon ay kasama na nga ng mga lehitimong Dabarkads. Kasi mukhang iyon ang sigaw ng fans, ihanap ng ka-love team si Atasha, at kaya niya kung ano man ang naabot ng AlDub noon.

Pero hindi puwedeng basta kung sino lang, ang peg siyempre ay gaya ni Alden, o mas matindi ang dapat na maging peg gaya ng tatay niyang si Aga. Aba kung may makukuha nga silang ganoon, baka malampasan ang “Tamang panahon” noon ng AlDub. SIyempre ibang generation na ang AlDub Nation, may bagong generation naman ngayon ng fans na kasing tindi rin nila, pero kailangan ang makuha nila sa audition ay iyong ok talaga.

Kung ang makukuha nila ay menos kay Alden at ibig sabihin lalong walang panama kay Aga, wala ring mangyayari. Kung sana sa panahong ito lang lumitaw si Keempee de Leon baka sakali pa.Siyempre ang kailangan ay bagets din kaya nga ang hinahanap nila ay 18 pataas, pero hindi naman puwede iyong 28 na, sobra na iyon. 

May makuha pa kaya silang ganoon sa panahon ngayon? Hindi mo masasabi, marami pa ring mga pogi sa tabi-tabi lang, kaso may talent ba?