Charo Laude saludo sa husay umarte at bait ni Nadine Lustre

MATABIL
ni John Fontanilla

MASAYA ang beauty queen/actress na si Charo Laude na naging top-grosser sa 2022 Metro Manila Film Festival ang pelikulang Deleter na kasali siya. Wala ring pagsidlan ang katuwaan niya para kay Nadine Lustre na hinirang bilang Best Actress. 

Nagpapasalamat nga ito sa mga taong nanood at sumuporta ng kanilang pelikula kaya ito nag-number one ito sa takilya.

Kuwento pa nito, nag-enjoy siyang katrabaho si Nadine dahil bukod sa mahusay itong aktres ay mabait at napaka-humble pa. Wish nga nitong makatrabaho uli ang awardwinning actress sa mga susunod na proyekto nito.

Sa ngayon ay abala si Charo bilang national director ng Mrs. Universe Philippines pageant. Isa rin siyang beauty queen na naging kinatawan ng Pilipinas sa Mrs. Universe 2019.

Ngayon ay full support ang ibinibigay nito sa kanyang mga reyna niyang sasabak sa 2022 Mrs. Universe pageant sa Sofia, Bulgaria, sa Pebrero 4 (Peb. 5 sa Maynila). Naunang itinakda ang pandaigdigang patimpalak nitong Disyembre sa Seoul, South Korea, ngunit may hindi inaasahang pangyayaring nagtulak sa organisasyon na itanghal ang contest sa home country nito.

Pinangungunahan ang pangkat ni Mrs. Universe Philippines Veronica Yu, kasama ang mga kapwa niya titleholder na sina Gines Angeles, Lady Chatterly Alvaro-Sumbeling, Jeanie Jarina, Virginia Evangelista, Michelle Solinap.