Nora, Matet pagmilagruhan kaya ngayong Pasko?

HATAWAN
ni Ed de Leon

WALA na kayang mangyaring milagro ng Pasko para kina Nora Aunor at Matet de Leon? Diretso nang sinabi ni Matet na hindi na niya kakausapin pa ang kanyang nanay-nanayan. Si Nora naman, simula’t simula ay “deadma” at hindi pinapansin kung ano man ang mga reklamo at sinasabi ni Matet.

Dalawang bagay ang kahulugan niyan, maaaring nagpapalipas lamang nang panahon si Nora para kumalma nang kaunti si Matet at saka niya kakausapin para magkaintindihan silang mabuti. Maaari rin namang ayaw na niyang pansinin talaga si Matet ano man ang sabihin niyon, basta itutuloy niya ang kanyang negosyo para may pagkakitaan.

Sa totoo lang kasi, kailan pa ba ang huling pelikula ni Nora? Magkano ba ang bayad sa kanya sa mga pelikulang indie? Hindi kami naniniwala na iyong talagang presyo ni Nora kayang ibigay sa kanya sa mga pelikulang indie. Kailan pa iyon? Kailan pa rin ang huling tv show niya? Ubos na rin ang kinita niya roon.

Totoo na nakatatanggap naman siya ng “artists’ pension” bilang isang national artist pero maliit lang iyon at masasabi nga sigurong barya lang sa status ni Nora. Iyon siguro ang dahilan kung bakit nang alukin siyang gamitin ang pangalan niya  sa de boteng tuyo at tinapa ay pumayag siya, kahit alam niyang may ganoong negosyo rin si Matet.

Wala namang exclusive patent si Matet sa negosyo, in fact maraming de boteng tuyo at tinapa na nauna na sa kanya. Nasaktan lang siguro iyong bata dahil ginaya pa siya ng nanay niya. Kung ang ginawa sigurong negosyo ni Nora ay ensaymada, o espasol, susuportahan pa siya ni Matet. Kaso nga diretsong tinamaan ang negosyo ni Matet.

Pero may ilang araw pa naman bago mag-Pasko. Sana may mangyari pang milagro na magkasundo ang mag-nanay, kahit na ba ampon lang si Matet eh.