Sa Guyong triangle
74-ANYOS LOLA SINORO NG DUMP TRUCK, PATAY

BINAWIAN ng buhay at halos nagkalasog-lasog ang katawan ng isang 74-anyos lola nang masoro ng isang dump truck sa sa bayan ng Sta. Maria, lalawigan ng Bulacan, nitong Martes ng gabi, 29 Nobyembre.

Sa nakalap na ulat, kinilala ang biktimang si Gloria San Jose, 74 anyos, nangangalakal at residente sa Sitio Marjanaz, Brgy.Guyong, sa nabanggit na bayan.

Nabatid na dakong 9:00 pm kamakalawa, galing ang biktima sa pakikipaglamay sa isang burol at habang naglalakad sa parteng triangle ng By-Pass road ng Brgy. Guyong ay biglang sinoro ng humaharurot na dump truck.

Dead on-the-spot ang biktima na hindi hinintuan ng driver ng dump truck, sinabi ng ilang nakasaksi na tumakas papunta sa direksiyon ng Brgy. Tambubong, Bocaue.

Kasalukuyang nakaburol ang labi ng biktima sa Gulinao Funeral Homes sa By-Pass Road, Brgy. Guyong, habang patuloy na nagsasagawa ng follow-up operation ang mga tauhan ng Sta. Maria MPS upang matunton ang driver at ang dump truck na sangkot sa insidente. (MICKA BAUTISTA)