ni ROSE NOVENARIO
NAHAHARAP sa kasong plunder, graft and corruption, grave misconduct, at gross neglect of duty ang ilang matataas na opisyal ng National Printing Office (NPO) sa Office of the Ombudsman dahil sa kuwestiyonableng P197-milyong transaksiyon sa isang pribadong printing company para sa nakaraang May 2022 elections.
Isinampa ng anti-corruption group Task Force Kasinag ang mga reklamo laban kina NPO Director IV Carlos Bathan, at NPO officials Engr. Benedicto Cabral, Yolanda Marcelo, at Leah Dela Cruz.
Naghain din ang grupo ng mga reklamo laban kay Holy Family Printing Corporation President Leopoldo Gomez.
Sa isang press conference, sinabi ni TFK President John Chiong na pumayag ang NPO na ibalik sa Holy Family Printing Corp., ang P197 milyong kita sana ng gobyerno mula sa kasunduan para sa pag-iimprenta ng mga balota para sa May 2022 national at local elections.
Sinabi ng TFK, batay sa joint revenue and revenue sharing agreement ng NPO at Holy Family Printing, kikita sana ang NPO ng P2 kada balota at 16.88% mula sa printing of ballots, habang ang 83.11% ay mapupunta sa Holy Family.
Sa kabila umano nito’y siningil pa rin ng Holy Family ang NPO ng 16% mula sa kinita sana ng ahensiya.
Ani Chiong sa reklamo sa Ombudsman, ginamit ng mga opisyal ng NPO ang isang kuwestiyonableng authorization letter na nilagdaan ni dating Press Secretary Trixie Cruz-Angeles para ilabas ang naturang halaga.
Giit ni Chiong, ang naturang transaksiyon sa pribadong kompanya ay dapat dumaan muna sa Commission on Audit (COA), at hindi dapat desisyon lamang ng NPO.
Itinanggi ni Bathan ang mga akusasyon laban sa kanya at ibang NPO officials.
