HATAW! D'yaryo ng Bayan hatawtabloid.com
(ni JOHN FONTANILLA)
MAY mga bagay na sobrang nami-miss ni Vandolph Quizon simula nang iniwan sila ng kanilang pinakamamahal na ama na si King of Comedy Dolphy lalo na noong nag Pasko at Bagong Taon.
Kuwento ni Vandolph sa virtual press conference ng kanilang gag show sa Net 25 na Quizon CT/ Quizon Comedy Theater last January 11 na sa tuwing sasapit ang Kapaskuhan ay ang kanilang butihing amang si Dolphy ang tumatayong Santa Claus sa kanilang lahat na nagbibigay sa kanila ng ampaw at kasabay na kumakain sa hapag kainan at nagtatawanan sa mga hirit nitong jokes.
Ito nga ang gusto niyang ibalik sa kanilang pamilya ang pagsama-sama sa tuwing sasapit ang Pasko at Bagong Taon at kinausap na nito ang kanyang mga kapatid. Nagkataon lang na nag-pandemic kaya hindi natuloy pero nag-usap sila na gagawin na nila ito taon-taon ‘pag wala ng pandemya.
Kaya naman very thankful ito na ang kanyang mga kapatid na sina Eric at Epy ang makakasama sa show sa Net 25.
Tribute nila ito sa kanilang Daddy Dolphy, na ang ilan sa mga classic na eksena ng Comedy King na sumikat sa kanyang mga proyektong ginawa ay mapapanood sa Quizon CT.
Nakasentro sa pamilya ang kanilang gag show, limitless ang mapapanood dito kaya naman every episode ay iba’t iba ang magiging putahe nito sa mga manonood na dapat abangan.
Bukod sa Quizon Family mapapanood din sa gag show sina Martin Escudero, Bearwin Meily, Gene Padilla, Garry Lim, Tanya, Charuth, at Billie Hakenson. Mula sa direksyon nina Eric at Epy, mapapapanood ang Quizon CT tuwing linggo 8:00 p.m. sa Net 25.
(JOHN FONTANILLA)
