HATAW! D'yaryo ng Bayan hatawtabloid.com
HATAWAN
ni Ed de Leon
MAGANDA iyong sinabi ni Yorme Isko Moreno, na kung siya raw ay hindi mananalong presidente ng Pilipinas sa eleksiyon sa susunod na taon ay magre-retiro na siya sa politika. Aasikasuhin naman niya ang matagal na niyang atraso sa kanyang pamilya, na hindi niya halos makasama dahil sa trabaho niya.
Baka makumbinsi rin si Yorme na bumalik sa industriya ng pelikula. Aba iyang mga ganyang tao ang kailangan natin, iyong alam kung ano ang pelikulang kikita, at maaaring mamuhunan. Ang mga tao sa industriya ngayon, una hindi alam kung anong pelikula ang commercially viable, kaya walang ginawa kundi sisihin ang mga sinehan. Ikalawa, puro lang daldalan wala namang puhunan.
Palagay namin, win-win situation ang industriya, Kung manalo siya malaking bagay iyon sa industriya. Kung matalo naman siya, eh ‘di magbalik na nga lang siya sa industriyang nag-angat sa kanyang buhay.
Si Yorme ay hindi lang pinasikat, marami rin naman siyang natutuhan kay Kuya Germs noong araw at magagamit niyang lahat ang mga natutuhang iyon.
