Iconic singer/songwriter Heber Bartolome pumanaw na sa edad 73

HATAWAN
ni Ed de Leon

KINOMPIRMA ng kanyang kapatid na si Jessie, na yumao na nga ang iconic singer songwriter na si Heber Bartolome noong Lunes ng gabi, Nobyembre 15. Si Heber ay 73 years old na. Sa kuwento ng kanyang kapatid, tinawagan daw siya at sinabing isusugod nga si Heber sa ospital dahil nawalan ng pulso. At matapos lang daw ang 15 minutes ay nakatanggap ulit siya ng tawag na wala na nga si Heber.

Inatake raw si Herber, at ang suspetsa niya iyon ay dahil na rin sa dati ng sakit niyon na prostate cancer. Hindi pa rin maliwanag kay Jessie ang mga nangyari hindi pa rin niya masabi kung saan ibuburol si Heber, pero tiniyak niyang magkakaroon ng burol iyon dahil ang ikinamatay naman ay hindi Covid, at sa ngayon naman sa ilalim ng alert level 2, pinapayagan na ang lamayan. Naniniwala si Jessie na hindi maaaring hindi dahil napakaraming fans ni Heber na tiyak na gustong magbigay galang sa kanyang pagyao.

Si Heber at ang kanyang itinatag na rock band, iyong Banyuhay, at maraming ginawang mga hit song at itinuring nga ang aktibistang singer na isang icon ng music industry sa ating bansa.