Vice Ganda may ibinuking: may ‘di sila magandang ginawa kay Karylle

HATAWAN
ni Ed de Leon

IBINUKO at inamin mismo ni Vice Ganda sa kanilang cable/internet show mismo na minsan may ginawa silang hindi maganda laban sa singer na si Karylle. Mayroon daw silang isang chat group na kasali si Karylle, hanggang may magbuo ng isa pang chat group na lahat sila ay kasali rin maliban kay Karylle.

Maliwanag kung ganoon na gusto nilang ipuwera si Karylle. Wala naman siyang sinabi kung bakit ipinupwera nila si Karylle sa kanilang chat group. Wala naman siyang sinabing si Karylle ay pinagtsi-tsismisan nila sa chat group na hindi siya kasali. Ewan kung nalaman din iyon ni Karylle noon, pero kung nalaman niya iyon, napakasama ng ginawa sa kanya, at masama ang ugali ng mga inakala niya kaibigan niya dahil kasama niya sa show. Hindi mo masasabing iyong nagsimula lang eh, kasi lahat sila nagkasabwatan na alisin si Karylle sa kanilang chat group. Delikado pala silang mga kasama.