Lito Camo inako ang pagkakautang ni Pacman kay Mike Hanopol

HATAWAN
ni Ed de Leon

MABUTI naman at naayos na ang paniningil ni Mike Hanopol kay Senador Manny Pacquiao. Ang akusasyon ni Mike, pinagawa raw siya ni Pacman ng tatlong kanta. Matapos iyon pinuntahan daw niya sa senado si Pacman. Ang tagal daw nilang pumila at ang tagal naghintay.
Nagutom siya dahil sa tagal ng paghihintay, tapos hindi binayaran ang kanyang tatlong kanta. Eh ang pera niya sapat lang na pambayad sa driver niya noong araw na iyon. Masama talaga ang loob niya. Ang tingin naman namin doon wala silang usapan na babayaran ang kanyang ginawang kanta noong araw na iyon. At alam naman ninyo, kahit na sinong senador, lalo na at may sesyon napakahirap na makausap sa senado. Bukod kasi sa kanilang trabaho, napakarami ring mga taong gustong makasingit para makausap sila, o makahingi ng tulong. Kaya diyan sa senado, kailangan ang prior appointment.

Pero ngayon, inako ng composer na si Lito Camo ang paniningil ng kantang ginawa ni Hanopol kay Pacman. Baka nga kasi hindi pa nakararating kay Pacman ang ginawa niyang kanta.