Jos Garcia napurnada ang pag-uwi ng ‘Pinas

MATABIL
ni John Fontanilla

UUWI sana ng Pilipinas ang Pinay international singer na nakabase sa Japan, si Jos Garcia para tumanggap ng award sa 2021 Philippine Faces of Success bilang Global Artist-Japan ngayong Agosto at para na rin mag-promote ng kanyang latest single na Nagpapanggap.

At dahil sa pagkalat ng bagong variant (Delta) ng Covid-19, pansamantalang ‘di muna matutuloy ang Philippine Faces of Success, kaya naman minabuti na lang ni Jos at ng kanyang home studio na ipagpaliban ang pagpunta ng Pilipinas.

Excited na nga sanang makauwi ng Pilipinas si Jos dahil bukod sa pagtanggap  ng award, kasama rin ito sa 100 Most Influential People of 2021 sa larangan ng musika ng Aspire Magazine Philippines.

Sa ngayon, abala ang singer sa kanyang matagumpay na online program na Goodvibes with Jos Garcia na napapanood sa Best TV 31 tuwing Sabado at guesting sa iba’t ibang online shows sa Pilipinas at Japan.