ABS-CBN sinaluduhan ang mga artistang nanatili sa kanila

HATAWAN
ni Ed de Leon

NANATILI namang tahimik ang mga taga-Mother Ignacia kahit na marami na silang stars na nagtalunan sa ibang networks pero nang lumabas na si John Lloyd Cruz sa network sa Kamuning, mabilis sila sa kanilang pralala na ikino-quote ang kanilang Chairman Emeritus na si Gabby Lopez na nagsabing marami nang mga artistang nagdaan sa ABS-CBN, pero ang mga star ay nawawala, nalalaos, pero ang network ay nananatili.

Sinabi rin nilang saludo sila sa mga star na nananatili sa ABS-CBN sa kabila ng sitwasyon niyon sa ngayon. Marami nga kasing bagong dagok sa network, una na nga iyon kanilang properties na inilagay sa mortgage registration ng mga pinagkakautangan nilang banko na hindi nila nababayaran simula nang ipasara ang network.

Ikalawa, ang mukhang lumabong pagbabalik nila sa 2023 kung hindi nga bibitiw ang kasalukuyang administrasyon. Huwag ninyong sabihing papayagan ng mga kakampi ni Presidente Digong na mabuksan ang network na sinabi niya na haharangin ang franchise.

Aba sa ganyang sitwasyon, dapat nga nilang saluduhan ang mga artistang nanatili sa kanila.