Cherry Pie sa kanyang komentong EWANQ

ANG lakas ng tawa namin nang makita namin ang post ni Cherry Pie Picache na pagkatapos daw ng idineklarang ”NCR bubble” na MECQ ang kasunod daw ay “EWANQ”.

Kasi nga naman walang nakatitiyak kung ano ang susunod na aksiyon ng gobyerno. Mayroon pa ngang lumalabas na biruan na may pinaiikot daw na roleta kung anong “Q” ang susunod na idedeklara.

Habang may mga bansa kagaya ng Australia at New Zealand na nagsasabing nalampasan na nila ang problema ng Covid, wala na silang restrictions. Kontrolado nila ang pagkalat ng sakit kahit na wala pang bakuna. Rito sa atin hinuhulaan na lang natin kung ilang taon pa ang itatagal ng problemang ito na naglublob na rin sa ating bansa sa napakalaking pagkakautang na babayaran daw natin hanggang 2049.

Apo na ng mga batang kapapanganak pa lamang ang magbabayad ng lahat ng utang natin dahil sa Covid, na ang naging pakinabang lang naman natin ay ilang kilong bigas at ilang latang sardinas. Iyan namang bakuna donation lang ng China, kaya nga hindi natin maawat angkinin man ang Spratley’s. Kaya tama si Cherry Pie, EWANQ.

HATAWAN
ni Ed de Leon