Guesting ni Arjo ‘di susuportahan (AlDub may banta kay Maine)

ANO nga kaya ang mangyayari sa banta ng AlDub na hindi sila manonood at matutulog na lang oras na ipalabas ang sitcom ni Maine Mendoza na guest niya ang kanyang boyfriend na si Arjo Atayde?  Kung totoo ngang gagawin iyan ng AlDub nation, tiyak na apektado ang audience share ng sitcom nila. Mabuti nga kung matutulog na lang sila, eh kung manood pa sila sa kalabang show, mas malabo ang dating.

May isang katotohanan na kailangan nating tanggapin, hindi nakakuha ng popular support ang relasyon nina  Maine at Arjo, kasi karamihan ng fans ni Maine ay AlDub at nakasuporta kay Alden Richards. Si Arjo naman ay isang actor na hindi nagkaroon ng isang malaking hukbo ng fans para suportahan ang kanyang career.

Mukha ngang kung magkakaroon ng isang project na silang dalawa ang pagsasamahin, mahihirapan silamg makakuha ng popular support. Malalaman natin iyan pagkatapos na mailabas ang sitcom nila. Kung sa bagay si Vic Sotto naman ang sinasabing nagdadala niyon, pero malaking bahagi talaga ng audience iyong AlDub.

Iyang AlDub, lalo na noong kainitan ng love team nina Maine at Alden, talagang sobra ang dami kaya nga ang tindi ng ratings noon ng Eat Bulaga, na para ngang wala nang nanonood sa ibang shows. Noong masira nga ang love team, at matapos na aminin ni Maine ang relasyon nila ni Arjo, nanlamig iyong AlDub, marami rin ang nawalang fans, medyo nabawasan na nga ang audience share nila.

Malalaman natin kung ano nga ang kahihinatnan ng pagiging guest ni Arjo sa sitcom nina Maine.

HATAWAN
ni Ed de Leon