Sunshine to Chuckie — There was no us

NAKU, napahiya si Chuckie Dreyfus noong sabihin ni Sunshine Cruz na hindi totoong naging magsyota sila noong panahong magkasama pa sila sa That’s Entertainment. Noon kasing maging guest si Chuckie sa  Huwag kang Judgmental, portion ng Eat! Bulaga, natanong siya kung ilan ang naging girlfriends niya roon sa That’s Entertainment. Ang isinagot niya, ”siyam o sampu yata.”

Nang sabihin sa kanya na pangalanan niya maski dalawa lang sa siyam o sampung iyon, binaggit niya ang pangalan nina Jessa Zaragoza at Sunshine.

Mabilis na nag-react si Sunshine at inilagay sa kanyang social media post na ”there was no us.”

Ikinaila rin ni Sunshine ang sinabing iyon ni Chuckie, at sabi nga niya sa amin, ”alam naman ninyo nang pumasok ako sa ‘That’s,’ ilang taon lang ako noon. Wala pa akong alam sa ligawan at saka alam naman ninyo hindi ba, ang una kong naging boyfriend iyong naging asawa ko rin. Siguro nga if I had the experience of having boyfriends before, baka iba ang kuwento ng buhay namin, kaya lang siya ang unang nanligaw eh. Nene pa ako noon,” sabi ni Sunshine.

Ito rin ang kauna-unahang pagkakataon na nagkaroon ng ganyang klaseng reaksiyon sa mga statement ng mga kasali sa Huwag Kang Judgemental. Wala pang nade-deny na statements doon.

Totoo iyong sinasabi ni Sunshine, kasi nagsisimula pa lamang ang batang iyan ay naging close na iyan sa amin, at wala siyang nababanggit noon na naliligaw sa kanya si Chuckie. Wala rin naman kaming narinig mula sa iba. Eh iyang si Sunshine, walang sikreto iyan. Noong una ngang manligaw sa kanya si Cesar Montano inamin agad niya eh, although nakiusap siyang huwag naman munang isulat.

Kaya sa totoo lang, maski kami nabigla nang mapanood namin si Chuckie na binanggit ang pangalan ni Sunshine. Iba ang alam naming gustong diskartehan ni Chuckie noong panahong iyon.

HATAWAN
ni Ed de Leon