HATAW! D'yaryo ng Bayan hatawtabloid.com
TAHIMIK na sana ang lahat, pero nang lumabas daw na parang nagsisinungaling pa siya, nagpasyang magsalita si Jerry Tamara, bodyguard ni Sarah Geronimo, at magsasampa rin ng demanda laban kay Matteo Guidicelli na sinasabi niyang sumapak sa kanya, nang pakiusapan niya si Sarah na kausapin muna si Mommy Divine bago tuluyang umalis kasama ng kanyang asawa.
Sinabihan daw siya ni Matteo na, “huwag kang makialam dito, asawa ko si Sarah.” At nang hingin daw niya kay Sarah sa ikalawang pagkakataon na kausapin muna ang ina, roon siya nasapak si Matteo.
Aminado naman siya na nagpa-blotter siya, kumuha rin siya ng report sa medico legal, pero noong una wala sana siyang planong magdemanda, “dahil mababait naman ang mga amo ko.” At naisip niyang dala lamang iyon ng init ng ulo. Pero noon ngang sinabing hindi naman siya sinapak, doon niya inilabas ang totoo. Nagbigay ng detalye si Tamara ng kanilang pinuntahan noong araw na iyon, bagama’t sinasabi niyang wala siyang nasaksihang kasal, makikita mo na ang kasal ay naganap nga sa second floor ng Victory Christian Fellowship Church na naka-lock noon, at reception lamang ang ginanap sa Ministry of Crab sa Shangrila BGC, na naganap naman ang kaguluhan.
Sinabi ni Tamara na nagkapalitan ng hindi magagandang salita, at sinabi pa ni Matteo na, “baliw iyan, baliw iyan” kay Mommy Divine na sinagot naman niyang ‘huwag naman po ganoon dahil mommy siya ni Ma’am Sarah.’ Sinabi rin niya na habang nag-uusap sina Sarah at Mommy Divine roo sa isang kuwarto, nagbalik pa si Matteo at hinahanap naman ang tatay ni Sarah na alam niyang tinawagan ni Mommy Divine na magpunta roon, at sinabi raw sa kanya, ”pagdating niya sabihin mo magsuntukan na lang kami.” Siguro nga talagang mainit na mainit na ang ulo ni Matteo noong mga oras na iyon.
Tama naman ang sinasabi ng iba, magkakasundo-sundo rin iyan, pero kung ganyan nga kalaki ang gap, palagay namin matatagalan ang pagkakasundo ng kanilang mga pamilya.
HATAWAN
ni Ed de Leon
