Jiro, sabit lang sa gulo?

KUNG totoo ang sinasabi ng ilang testigo na naglabas ng kanilang nakita sa social media, aba eh kawawa nga si Jiro Manio. Si Jiro ay nakakulong ngayon sa Marikina Police Station matapos na siya ay sampahan ng kasong frustrated homicide, matapos na sinasabing saksakin niya ang biktimang kinilalang si Zeus Doctolero.

Ayon sa report ng pulisya, sinugod daw ni Jiro si Doctolero na naglalakad lamang sa kalye at sinaksak sa hindi malamang dahilan. Hindi ganoon ang sinasabi ng isang nakakita. Ayon sa isang Allan Tembong Llianko, nakita niya at ng kanyang mga kasamahan ang buong pangyayari. Nilapitan daw ng sinasabing biktima si Jiro, pinukpok nang helmet ng dalawang ulit. May umawat na umano, pero nilapitan pang muli ni Doctolero si Jiro at muling hinambalos ng helmet. Doon lang daw lumaban si Jiro at nagkaroon nga ng gulo.

Mayroon namang isa pa, iyong Genevieve Galvez na nagsabing si Doctolero ay stalker niya, at talagang ipahuhuli na nila sa pulis nang magpunta sa bahay nila. Noon daw paalis na iyon, at saka nasalubong si Jiro na wala namang kinalaman sa kanila.

Pero hindi puwedeng kuwento at social media lang. Kung talagang totoo ang sinasabi nila, aba eh kawawa naman si Jiro na siyang nadidiin. Dapat magbigay sila ng statememt sa pulisya dahil kung hindi nila gagawin iyon, walang mangyayari at si Jiro nga ang mapuputukan ng lahat ng iyan.

Kung totoo ang sinasabi ng dalawang iyan, sabit lang pala si Jiro at nangyari lamang iyon dahil siya ang napagbalingan niyong si Doctolero.  Pero ano nga ba ang totoo?

HATAWAN
ni Ed de Leon