HATAW! D'yaryo ng Bayan hatawtabloid.com
BUKAS, opisyal nang tapos ang Metro Manila Film Festival. Sa Miyerkoles, papasok na ang mga pelikulang Ingles, kabilang na nga ang inaabangan naming Star Wars. May palagay kami na may isa o dalawa pang pelikula sa MMFF ang maaaring ipalabas ng isang linggo pa pagkatapos ng festival. Mukhang kaya pa nila. Hanggang nitong huling weekend, mahaba pa ang pila sa pelikula ni Aga Muhlach na siyang naging top grosser sa taong ito.
Walang naglalabas ng official gross. Gagawin iyan ng Metropolitan Manila Development Authority (MMDA) matapos ang ilang buwan siguro. Kasi ayaw nilang malaman din ng mga tao kung anong mga pelikula ang hindi talaga kumita, dahil kung lalabas iyon, lalong walang manonood ng mga iyon. Pero hindi man nila ilabas, alam naman ng mga tao na ang apat na huling pelikula ay balolang nang lahat. Ang gagawin lang nila, titingnan nila kung anong pelikula at sinong mga artista ang binigyan ng award. Iyon ang mga balolang na hindi kumita talaga.
Ano mang alibi ang sabihin, maliwanag na sadyang pinili nilang ibigay ang mga award sa mga pelikulang hindi kumikita, pati na nga best float eh. Gusto kasi nilang tulungan ang mga bottom holder. Tutal wala namang makaka-kuwestiyon kung ano man ang ilabas na desisyon ng mga hurado. Pero ang nangibabaw pa rin ay kung ano ang gusto ng mga tao. Kumita pa rin ang mga pelikulang pinaniniwalaan nilang maganda. Maliwanag sa nangyari na hindi nga nakakatulong ang awards para kumita ang pelikula.
Humakot ng napakaraming awards sina Judy Ann Santos, pero nakikiusap silang huwag naman silang alisan ng sinehan. Dinagdagan naman sila ng sinehan, pero hindi pa rin kumita. Hindi kasi iyon ang people’s choice, at alam naman nila iyon from the start. Gumawa sila ng pelikula para maisali sa mga festival sa abroad at manalo ng award. Inisip ba nila na ang pelikula nila ay magiging box office hit?
Parang si Nora Aunor iyan eh. Sikat si Nora. Ang dami niyang fans. Pero gumawa siya ng indie at isinali sa festival, hindi ba nangamote rin siya at after the first day wala na rin siyang sinehan?
Tanggapin na natin ang katotohanan, basta festival, ang mangingibabaw kung ano ang gusto ng mga nagbabayad para manood ng sine, hindi iyong gusto ng mga kritiko na gumagamit ng passes para panoorin ang mga pelikula.
HATAWAN
ni Ed de Leon
