HATAW! D'yaryo ng Bayan hatawtabloid.com
MASUWERTENG nilalang itong si Commissioner Jaime Morente, walang mambabatas sa Senado at Kamara na interesadong imbestigahan ang talamak na human smuggling, ang dating ‘tabakohan’ ng mga tiwaling kawani at ahente ng Bureau of Immigration (BI) sa Ninoy Aquino International Airport (NAIA).
Sa mga nakaraan ay natalakay natin ang garapalang sindikato ng “escort service” sa palusotan ng ‘Pinoy tourist workers’ sa NAIA, ilang buwan na ang nakararaan.
Matapos mabulabog ang tabakohan, inakala nating tapos na ang raket, pero mali pala tayo.
Nabalitaan natin tuloy at nalipat lang pala ang malakasang human smuggling ng Pinoy tourist workers na pinalulusot patungo sa mga bansa ng United Arab Emirates (UAE) para magtrabaho.
Sa Macapagal International Airport (DMIA) sa Clark, Pampanga talamak ang salyahan ng undocumented Pinoy workers, pati na ang pagpasok ng mga ‘Kambing’ mula sa bansang India.
Kaya naman tiba-tiba si “Joseph,” ang may hawak ng tabakohan sa DMAI-Clark.
Sa Pinoy tourist workers pa lang, hindi bababa sa halagang P800K ang pinakamaliit na kita ni Joseph kada araw.
Bawa’t araw, 20 Pinoy tourist workers ang pinakamatumal na bilang ng napapalusot ni Joseph patungong UAE, katumbas ng singil na P40-K kada ulo.
Pero may araw na dagsa ang mga pasaherong umaalis kaya naman mas malaki ang kita ni Joseph sa pamamagitan ng mga alaga niya na travel agency ang gamit sa illegal recruitment at deployment ng undocumented overseas workers at Pinoy tourist workers sa UAE.
Hindi pa kasama riyan ang limpak na kita ni Joseph sa pagpasok ng mga Kambing, ‘este, Bombay na restricted nationality mula sa India.
Ipinangangalandakan daw ni Joseph na nagre-remit siya ng income sa main office ng BI mula sa kita ng kanyang ‘human smuggling’ at ‘Kambingan’ sa DMIA-Clark.
Aba’y, baka naman walang kamalay-malay niyan si Morente na matagal na siyang binabambo ni Joseph sa ulo!
Baligtad yata, bakit imbes NAIA ang ilipat ay human smuggling ng Pinoy tourist workers ang inilipat sa DMIA?
BI 79TH ANNIVERSARY NABABOY SA INTRIGA
MAGULO raw ang idinaos na pagdiriwang ng BI, hindi raw kasi nasunod ang inihandang programa sa katatapos na ika-79 na anibersaryo ng ahensiya.
Punong-puno ng intriga, pati na ang paggagawad ng award sa mga opisyal at empleyado ng BI dahil nga nabalewala ang effort ng organizing committee na itinalaga.
Una, hindi alam kung bakit si Department of Justice (DOJ) Sec. Menardo Guevarra ay hindi nakadalo o sadyang umiwas sa mahalagang okasyon ng BI.
Ipinagtaka rin ng mga mababang empleyado ang hindi pagkakabanggit sa mga napiling awardees sa kanilang hanay.
Suspetsa nila, si BI Admin Chief Mary Ann Caranto ang promotor na nagmaniobrang baguhin ang programa.
Buong akala raw marahil ni Caranto, siya ang mapipiling awardee bilang Division Chief of the Year ng BI na napunta kay Jun Jun Gueverrro, hepe ng Immigration Regulation Division (IRD).
Kung totoo ang hinala kay Caranto, bakit kailangan idamay at personalin ang programa?
Payo natin kay Caranto, kung nais niya ng award ay magpasabi lang siya sa atin para kahit sampung plaque ay maipagpagawa natin siya ng “Karumal-Dumal Award” sa Claro M. Recto.
‘LAPID FIRE’ MAPAPANOOD SA SKY CABLE AT TV PLUS
SA mga hindi pa nakaaalam, ang ating programang “Lapid Fire” na napapapakinggan sa DZRJ-Radyo Bandido (810 Khz./AM), 10:00 pm to 12:00 mn, Lunes hanggang Biyernes, ay sabayan nang napapanood sa Sky Cable Ch. 224 at TV Plus.
Maraming salamat po sa pagtangkilik!
(Para sa anumang sumbong at reaksiyon, mag-text o tumawag sa 09166240313. Maaring ipadala ang inyong liham sa e-mail address: [email protected])
KALAMPAG
ni Percy Lapid
