Tunay na relasyon ni Ion kay Vice Ganda, inamin na

TAPOS na ang gimmick at ang mga ilusyon. Ngayon inaamin na niyong dating bikini model na si Ion Perez na lumalabas din sa isang noontime show na wala silang naging relasyon ni Vice Ganda. Inamin niyang sinasabi niyang minahal niya iyon “bilang isang kaibigan” lamang.

Kung may namagitan sa kanilang dalawa nang higit sa pagiging magkaibigan, wala na kaming pakialam doon, pero maski naman noong una hindi kami nakisakay sa gimmick na iyan eh.

Kailangang gawin iyon niyong Ion para siya mas mapansin ng publiko dahil nagsisimula pa lamang siya sa showbiz. Sa kaso naman ni Vice Ganda, kailangan niyang patulan iyon dahil bahagi iyon ng kanyang career. Pero ang paniwala namin hanggang doon lang talaga iyon.

Hindi nabalita na iyang si Ion ay talagang pinagkagas­tahan ni Vice Ganda, iyon ang mga tsismis noong araw tungkol sa kanyang mga naging boyfriends. Kung nakarelasyon ba niya iyang Ion maaaring hindi rin niya gastusan?

May isa sinasabi pa ang isa naming kaibigang Psychologist. Sabi niya ang isang lalaking nai-in love sa isang bading ay bading din. Kasi kahit na bading iyon, kapwa lalaki rin iyon. Kaya ang nagtatagal na same sex relationship, iyon ay dahil pareho silang ganoon.

Kung hindi, maliwanag na may ibang dahilan. May ibang interest bukod sa isang pakikipag-relasyon lamang.

HATAWAN
ni Ed de Leon