Phil Younghusband, ikinasal na sa Fil-Spanish GF

TAHIMIK na tahimik ang mga pangyayari, kasi naman naganap ang kasalan noong isang araw lamang hindi sa Pilipinas kundi sa Canterbury, United Kingdom. Nagpaksal na ang sikat at poging football player na si Phil Younghusband, sa kanyang napakagandang Filipina-Spanish girlfriend na si Mags Hall. Nabalita lang iyan nang mag-post ng isang picture ng kasal ang kanilang official photographer sa isang social media platform.

Simula pa lang naman ng taon ay sinabing engaged na ang dalawa at talagang may balak nang magpakasal sa taong ito, pero hindi nga nila sinasabi kung kailan at kung saan. Iyang poging si Phil, sumikat din nang husto sa mga movie fan nang maging boyfriend ni Angel Locsin.

Aba maski naman si Angel mas sumikat noon dahil nakilala rin siya at sinundan ng mga football fan, dahil ang kanyang boyfriend ang sinasabi ngang superstar ng sports na iyon. Akala nga ng marami ay magkakatuluyan na ang dalawa, dahil si Angel talagang nanonood ng football tuwing maglalaro si Phil. Kasama rin naman si Phil sa mga showbiz functions ni Angel. Magkasama rin sila sa kanilang church activity. Pero sa hindi mo nga malamang dahilan, bigla ang naging split nila.

Si Angel nakipagbalikan kay Luis Manzano. Si Phil after some time nakilala na nga si Mags.

Sina Luis at Angel, nag-split din naman ulit. Si Phil, ayun at ikinasal na nga kay Mags.

Ganyan talaga ang mga love affair kung minsan. Hindi mo mahuhulaan kung ano ang mangyayaring kasunod, lalo na nga’t ang involved ay mga sikat na personalities, kasi maraming pressure sa kanilang buhay na nakaaapekto ng kanilang mga nagagawang desisyon.

May nagsasabing mali si Angel, dahil pinakawalan pa niya si Phil. Pero sino naman sila para magsabing mali nga ang kanyang naging desisyon?

HATAWAN
ni Ed de Leon