Sunshine, pinapak ng surot sa Taiwan

NATAKOT din naman ang aktres na si Sunshine Cruz na baka may madala pa silang surot sa kanyang bahay, matapos magbakasyon sa Taiwan at nag-check in sa isang hotel na maraming surot at papakin habang nagbabakasyon.

Walang nagawa si Sunshine kundi magreklamo laban doon sa Papa Whale Hotel, na siyempre pinaniwalaan nilang isang five star establishment dahil bakit naman sila ilalagay ng kanilang travel agent sa isang hotel na tadtad ng surot. Pero totoo, roon na raw yata natipon ang pinaka-maraming surot at talagang pinapak sila.

Nagreklamo silang ilipat sa walang surot na hotel, kaso marami sila at wala namang agad na malilipatang magkakasama rin sila. Kaya cut short na lang ang kanilang bakasyon dahil sa surot.

Pero ang masakit, naroroon nga iyong posibilidad na madala mo pa iyang surot sa bahay mo pag-uwi. Hindi ka nakasisiguro kung walang nakasingit sa mga dala mo. Hindi ka rin nakasisiguro kung ang mga gamit mo ay naitlugan ng surot, eh ang bilis dumami niyan.

Hindi naman nakamamatay ang kagat ng surot, pero nakasisira iyan ng kutis. Eh para sa isang artistang kagaya ni Sunshine, na may ineendoso pang beauty products, kung masira ang kutis niya dahil sa kagat ng surot napakalaking disaster niyon.

The moral of the story is, huwag basta magtitiwala sa mga lugar na pupuntahan ninyo. Siguruhin muna ninyo kung ano ang sitwasyon doon. Siguruhin muna ninyo ang lahat ng pasasakyan at patitirahan sa inyo, dahil kung nandoon na kayo at saka ninyo makikita ang kapalpakan, sa halip na mag-enjoy kayo sa inyong bakasyon, dusa pa ang aabutin ninyo.

HATAWAN!
ni Ed de Leon