HATAW! D'yaryo ng Bayan hatawtabloid.com
KUNG sabihin nila noong araw, ang isang actor ay “is only as popular as his least popular leading lady”. Kasi noong araw, sinasabing mas sikat ang artistang babae kaysa artistang lalaki. Sabi nila, mas sikat si Vilma Santos kaysa kay Edgar Mortiz. Mas sikat si Sharon Cuneta kaysa kay Gabby Concepcion. Pero ngayon mukhang naiiba na nga yata ang mentalidad ng mga fan, dahil kapansin-pansin na mas sumisikat ang mga artistang lalaki.
Ngayon naroroon ang paniniwala na si Daniel Padilla ang nagdadala kay Kathryn Bernardo. Si James Reid ang mas sikat kaysa kay Nadine Lustre. Si Alden Richards din daw ang dahilan ng pagsikat ni Maine Mendoza.
Napansin din namin iyan sa launching ng Bench sa kanilang teenwear noong isang araw sa isang mall sa Makati. Mukhang sa fans na naroroon, mas malakas ang tilian nila kay Bailey May kaysa kay Ylona Garcia. Maliban doon sa mga fan ng Bailona, mas may reaksiyon ang ibang mga tao sa mall sa paglabas ni Bailey.
Kung sa bagay, talaga namang malakas ang dating niyang si Bailey May. Hindi ba noong nagsisimula pa iyan doon sa isang reality show, napansin siya agad kahit na nga sabihing medyo off beat ang dating dahil inili-link siya noon sa isang kasama nilang lalaki rin. Noong mapatalsik iyon at saka nagsimula ang love team nila ni Ylona. Tapos naisama rin sila roon sa serye nina James at Nadine na mas nagkaroon ng exposure ang kanilang love team.
Pero sa totoo lang, pinagmamasdan namin iyong mga tao hanggang doon sa itaas ng activity center, mas nagkaroon sila ng reaksiyon kay Bailey.
Kaya nga masasabing suwerte rin naman iyang Bench, dahil masasabi ngang nasa kanila na ngayon ang lahat ng mga sikat na matinee idols. Pati si Bailey na halos nagsisimula pa lang nakuha na nila eh.
HATAWAN – Ed de Leon
