HATAW! D'yaryo ng Bayan hatawtabloid.com
NAKITA namin iyong trailer niyong The Escort. Ito iyong pelikula nina Lovi Poe, Derek Ramsey, at Christopher de Leon. Doon pa lang sa trailer, napakainit na ng love scene nina Lovi at Derek. Hindi namin alam kung gaano kahaba ang love scene na iyon o kung iyon na ba ang pinakamainit na bahagi ng eksena. Malalaman mo lang naman iyon kung mapapanood mo ang buong pelikula sa kanyang integral version, o director’s cut.
Iyon ang mga eksenang aalisin, o lalagyan ng note na “shorten” kung may sensura pa tayo sa pelikula. Ewan namin kung makaaabot sa mga ganyang eksena si Lovi kung nabubuhay pa ang tatay niyang si FPJ.
Pero mainit talaga ang mga eksenang iyon. Ang naalala namin ay iyong mga pelikulang nagawa noong mga late 80’s na nagsisimula ang mga pelikulang kung tawagin ay “sex trip”.
Pero ganyan naman talaga ang pelikula. Bumabalik-balik lang ang uso. Ang mahalaga lang ay kung napangalagaan naman nang husto ang mga ganoong eksena, kung bahagi iyon talaga ng istorya. Hindi kagaya noong araw na ang mga eksenang mas masahol pa nga riyan ay basta isinisingit na lang sa pelikula.
HATAWAN – Ed de Leon
