HATAW! D'yaryo ng Bayan hatawtabloid.com
MARAMI ang nagsasabi, sana naman daw iyang pagbabalik showbiz ni Aga Muhlach ay maging tuloy-tuloy na. Una, kailangan ng mga mahuhusay na artista. Aminin natin iyan. Marami tayong mga artista na wala namang alam kundi ang magpa-cute lamang. Aminin din naman natin, marami tayong mga artistang magagaling umarte, hindi naman cute sa paningin ng publiko kaya ayaw ding panoorin.
Sinasabi nga nila, bihira iyong guwapo na marunong umarte, kaya basta may ganoon asahan mo iyan ang maaaring kumita ang pelikula. Nitong mga huling panahon, with apologies to others na kakilala rin naman namin, aba eh dalawa lang ang nakita naming ganyang klase, sina Aga at Richard Gomez. Iyong iba, sad to say, kabilang sa ibang kategoryang sinabi namin.
Si Goma naging aktibo na naman sa showbiz for a while, pero ngayon talagang concentrated siya sa kanyang trabaho bilang mayor ng Ormoc. Si Aga muntik na ring agawin ng politika eh. Kaya ngayon marami ang natuwa na kung nawala man si Goma dahil sa trabaho niya bilang mayor, nagbalik naman si Aga.
Pero si Aga hanggang ngayon, mukhang tine-testing pa rin ang takbo ng showbusiness. Hindi mo naman siya masisi dahil tatlong taon siyang nagpahinga sa trabaho. Tinanggap niya ang pagiging judge roon sa Pinoy Boyband Superstars, dahil isang paraan iyon para makita kung ano ba ang pagtanggap sa kanya ng publiko.
Sigurado naman kami, batay sa nakikita naming reaksiyon ng mga tao sa pagbabalik ni Aga na hindi magtatagal at gagawa na ulit iyan ng pelikula, o baka makasali pa sa mga teleserye. After all, sa rami ng mga teleserye ngayon, kulang na kulang ng mga aktor na maaaring leading men.
Pero kung kami ang tatanungin, ang wish namin, pelikula ang gawin ni Aga dahil maaaring iyan ang magbangon ng industriya na hindi makatayo dahil sa kawalan ng artista, at kawalan ng mahuhusay na proyekto. Hindi naman maibabangon ang industriya ng mga pelikulang indie, na binarat ang budget at ang mga artista ay mga “has been”, “never was”, o “never will be”.
HATAWAN – Ed de Leon
