Direk Deo, alipin ng makinilya

NAGULAT kami noong isang gabi nang may magtanong sa amin kung alam daw naming yumao na si direk Deo Fajardo Jr. Si Deo ay nagsimula bilang movie reporter at writer ng mga komiks, hanggang sa nagsulat ng script sa pelikula, naging talent manager at nang malaunan director na rin. Nakilala siya sa mga ginawa niyang action movies.

Si Deo ang naka-discover at nakapagpasikat kina Rudy Fernandez at Robin Padilla. Hindi nga siguro masasabing siya ang nagpasikat pero naging discovery din niya for a while iyang si Coco Martin noong hindi pa iyon ang screen name niya. Si Deo rin ang naka-discover at nagsimula ng career noong araw ni Manny de Leon, na sumikat naman nang maitambal kay Nora Aunor.

Ang huli naming narinig, inatake nga si direk Deo, at isinugod na naman sa ospital mga last week yata iyon. Nauna roon masasakitin na siya, dahil na rin siguro sa kanyang edad, at saka sobra kasi kung magtrabaho iyan. Noong araw, natatandaan namin, kung biruin namin iyan ay “alipin ng makinilya” hindi kasi iyan tumitigil halos sa pagsusulat.

Nagtataka lang kami, parang hindi namalayan na yumao na siya. Ni walang nagsabi kahit na sa social media, pero may isa kaming kaibigang nagbigay ng kompirmasyon na talaga raw yumao na nga noong Sabado yata. Nakahihinayang na nawala ang ganyang mga tao na may malaki namang kontribusyon sa showbusiness.

HATAWAN – Ed de Leon