Sylvia, tuwang-tuwa nang makita ang mukha sa poster

NANINIWALA si Sylvia Sanchez na kung ano ang magagandang nangyayari sa kanyang career ay dahil ito sa kagustuhan ng Diyos.

Naniniwala ang mahusay na aktres na sa buhay ng tao ay laging may perfect timing. At ang pagbibida niya sa inaabangan at talaga namang napakagandang teleserye ay perfect timing, ito ay sa The Greatest Love.

Masaya nga ito nang makita niya ang sarili sa poster dahil sa tagal niya sa showbiz, ngayon lang siya nagkaroon ng picture sa poster ng mga proyektong ginagawa niya.

Tsika nga ni Ms Sylvia sa presscon ng The Greatest Love last July 14 na ginanap sa Dolphy Theater, ”Masaya! Noong nakita ko nga ‘yung poster sabi ko ano ito? Pagtingin ko ah mukha ko.”

Dagdag pa nito, ”May mga naging projects ako rati pero puro pangalan ko lang ‘yung nasa poster, pero rito mukha ko na.

“Sabi nga ng Diyos ‘di ba in his time, lahat perfect timing naniniwala ako roon and I think ito na ‘yung time ko.”

Ang The Greatest Love ang maituturing ng award winning actress na  kauna-unahan niyang pagbibida sa telebisyon, kaya naman labis-labis ang pasasalamat niya unang-una sa Diyos at sa pamunuan ng ABS-CBN sa pagbibigay sa kanya ng proyekto at sa palaging pagbibigay ng trabaho.

Makakasama ni Sylvia sa The Greatest Love sina Dimples Romana, Andi Eigenmann, Rommel Padilla, Matt Evans, Joshua Garcia, Ej Falcon, Ellen Adarna, at Arron Villaflor at mula sa panulat ni Ricky Lee.

Bukod sa mahuhusay ang actors ng seryeng ito, kapupulutan ito ng aral ng buong pamilya—mula sa anak, ina, at ama na mapapanood sa Kapamilya Network.

MATABIL – John Fontanilla