Lalong naging solido ang INC

MUKHANG kabaligtaran ang naging epekto nang walang tigil at planadong paninira ng ilang grupo sa Iglesia ni Cristo. Imbes humina ang simbahan, lalong lumalakas at dumarami ang tagasunod nito.

Noong isang taon pa pilit ginigiba ng grupo nila Lowell Menorca II at Isaias Samson ang INC. Nariyang nagsampa sila ng reklamong kidnapping at panggugulo laban sa liderato ng Iglesia, pero ibinasura lahat ito ng DOJ.

Sa larangang legal, wala pang naipanalo ni isang kaso ang kampo nila Menorca, kaya gawain na lang nilang magpuputak at magpapansin sa media para ipamukhang ginigipit umano sila ng Iglesia.

Kung totoo man ang mga paratang laban sa INC, matagal na dapat nag-alisang parang mga pusang nagulat ang miyembro nito. Pero ayon sa Iglesia, lumago pa ang hanay nila, halimbawa na sa bilang ng mga nag-aaral maging ministro ng simbahan. Kasalukuyang may 7,000 na bagong ministerial student na nagsasanay ng pagturo ng ebanghelyo sa College of Evangelical Ministry ng simbahan.

Dati’y nasa 2,000 lang ang bilang nila pero lumaki bigla nang umpisahang banatan sa media ang INC.

Mas nakakukuha pa ng simpatiya at suporta sa publiko ang INC ngayon. Unti-unti nang napapagod ang taumbayan sa mga kadramahan nina Menorca. Napansin na rin siguro nina Menorca ang pagbago ng ihip ng hangin dahil biglang tumakas papuntang ibang bansa at ‘di sinipot ang kasong siya mismo ang nagsampa. Hanggang ngayon ay missing in action pa rin ang dating kasapi ng INC.

Ano pa man ang personal na pananaw ng mambabasa tungkol sa Iglesia ni Cristo, ‘di maikakailang patuloy sa pagsulong. May bago silang ospital sa Quezon City. Dumarami rin ang enrolment ng tanyag na New Era University. Hindi naglalabas ng eksaktong pigura ang miyembro ang INC, pero may nakapagsasabing mas marami pa silang miyembro ngayon sa kabila ng mga pagsubok na hinaharap nito.

Mali yata ang naging “strategy” ng paninira nina Menorca. Hindi nila kayang tibagin ang Iglesia ni Cristo nang basta-basta. Lutang na naman sa mga usapin ang Iglesia dahil sa darating na eleksiyon, pero para sa ibang usapan na iyon.#

Anibersaryo ‘KO’ na pala

KUNG petsa ang pag-uusapan, dapat ay sa Abril 5 pa ang anibersaryo ng pag-aresto sa inyong lingkod sa Ninoy Aquino International Airport (NAIA) noong mag-Lenten break po tayo sa Japan kasama ang aking pamilya.

Pero maaga po nating naalala kasi, Linggo ng Pagkabuhay (Easter Sunday) nga nang arestohin ang inyong lingkod.

Upang hindi magkaroon ng eskandalo dahil kasama nga ang aking pamilya, sumama ang inyong lingkod nang mapayapa sa mga pulis-MPD.

Pero, aware po ako na mali at labag sa itinatakda ng batas at mga kasunduan ang pag-aresto sa mga mamamahayag lalo na kung araw ng linggo.

Sa ilang taon po ng inyong lingkod sa media industry, ang madalas na asunto po ng mga mamamahayag ay libel gaya ng iniasunto sa inyong lingkod. Hindi po extortion.

Ipinagkamali pa namin na asuntong Libel sa Bicol ang ipinang-aaresto sa amin, pero maling akala pala.

Isang asuntong libel na ang pagkakaalam namin ay nasa piskalya pa. Kaya nagulat kami nang matuklasan namin na asunto ng isang pulis na biglang sumampa sa piskalya.

Sabwatan ng pulis, isang immigration official (na sabi nga ni Pete Ampoloquio ay dinapurak na ng karma), at mga ‘wannabe.’

Bahala na po kayong mag-isip kung anong klaseng ‘wannabe’ ‘yung kasabwat ng mga pulis at immigration official.

Isa po sa maagap na dumamay sa inyo ang aming mga abogado at ang aming mga staff na hindi humiwalay hanggang sa ospital at hanggang kinabukasan.

Doon na rin po tayo dinalaw ni Mayor Alfredo Lim sa Manila Doctor’s Hospital at kasama pa namin hanggang sa paglalagak ng piyansa.

Lubos po ang ating pasasalamat sa National Union of Journalists of the Philippines (NUJP) na unang nagsalita laban sa illegal na pag-aresto sa dating presidente ng National Press Club (NPC) na tahasang pag-atake sa press freedom.

Ganoon din po sa Center for Media Freedom & Responsibility (CMFR) na kinondena rin ang ginawang pag-aresto sa inyong lingkod.

Sa Bandera po at sa Philippine Daily Inquirer, sa iba pang naglabas ng insidenteng ‘yan ng pag-atake sa ating press freedom at sa mga kolumnista po nagsulat ng sinapit natin kabilang na si Madame Imee Marcos.

Malaking kabalintunaan na ang inyong lingkod ay tumutulong sa mga kasamahan natin sa media na tuwing may warrant of arrest ay ginagawaan natin ng paraan upang huwag nang makulong. Kung walang pampiyansa ay sinisikap rin po nating maalalayan.

Ginawa po natin ‘yan noong nanunungkulan tayong presidente ng National Press Club at ginagawa po natin ‘yan hanggang ngayon bilag national chairman ng Alab ng Mamamahayag (ALAM).

Pero ang ikinalungkot natin, ang mga ‘Judas Iscariote’ sa hanay ng organisasyong ating kinabibilangan.

Hindi na tumindig laban sa pag-atake sa press freedom ‘e gumawa pa ng ‘drawing’ na ‘probe’ kuno.

Hakhakhakhak! Nakasusuka!

Ano naman kaya ang pinaimbestigahan?

‘Yung hindi napatulog ang inyong lingkod sa kulungan? At ‘yung natuklasan natin na minadali ang pag-iisyu ng warrant of arrest kahit wala pang resolution?!

Huwag po kayong mag-alala dahil sinampahan na namin ng kaso ‘yung mga ‘person of authority’ na lumabag sa ating Saligang Batas nang ilegal na arestohin ang inyong lingkod.

Gumugulong na po ang katarungan laban sa mga ‘person of authority’ na ginagamit sa pang-aabuso ang kakarampot na kapangyarihang ipinahiram sa kanila ng ating Saligang Batas.

‘Yung magagaling lumusot kaya hindi nasampahan ng kaso, ipinagpasa-Diyos na po natin sila…

Bahala na ‘yung ‘lords’ ninyo sa inyo!

‘Yung mga ‘lord’ rin ninyo na ‘yan ang dadapurak sa inyo ng karma (pahiram ulit Pete A.)              

Yes, isang taon na nga po ang nakararaan, pero hanggang ngayon, hindi pa rin nakatutulog nang mahimbing ang mga nagsabwatan para gawin  sa  inyong lingkod ang nasabing pag-aresto.

Kung sino man sila, hangad natin ang kapayapaan sa kanilang paghimbing.           

Sabi nga, rest in peace.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com