Knock-out si Pacman sa upak laban sa LGBT (Hayop? Hayop talaga!)

SAYANG talaga ang sandamakmak na kuwarta ng world champ na si Emmanuel “Manny” Pacquiao.

Hindi niya nagagamit nang tama ang kanyang milyones dahil hindi man lang siya nakaupa ng mga tamang tao para maging adviser lalo na sa mga public interview.

Ngayon ay kaliwa’t kanang upak ang dinaranas niya dahil sa komentaryo niyang mas masahol pa sa hayop ang same sex marriage.

Namanhid na yata ang buong utak at katawan ni Pacman sa dami ng bugbog na tinanggap niya sa hindi mabilang na laban sa lona.

Naubos ang kanyang sensibilidad dahil mas ninais niyang mamanhid ang utak at buong katawan kapalit ng sandamakmak na kuwarta na ngayon ay hindi niya maibili ng tamang kaalaman, pananaw at pang-unawa.

Kumbaga, hindi niya napunuan ng kanyang milyones ang kakulangang intelektuwal na hindi niya naipundar dahil nilamon siya ng pagnanasang takasan ang kahirapan sukdulang magkagula-gulanit ang bawat selyula sa kanyang katawan sa mga natatanggap na bugbog sa boksing.

Mismong ang matagal nang usap-usapan na siya ay minsang nagkaroon ng gay benefactor sa Paquita St., Sampaloc, Maynila ay naghulas na ‘ata sa isip ni Pacman!?

Nalimutan na kaya ni Manny ang kanyang ‘bestfriend’ doon sa Paquita St., na siyang bumibili ng kanyang underwear, toothpaste, sabon, deodorant, shampoo, etc.?

Hindi lang ang nakaraan ni Manny ang nagbabangon at kumakalat ngayon sa social media dahil sa kanyang insensitive na sagot sa isang tanong na puwede sana niyang masagot nang tama kung mayroon siyang magagaling na advisor

Nadamay na rin pati ang kanyang pamilya. Ang pisikal na kaanyuan ng kanyang ina ay pinintasan at ang pakikipagrelasyon sa isang lalaking mas bata pa kay Manny… ‘yan daw ang tunay na hayop!

Kinaladkad din sa isyu ang hindi umano matapos-tapos na pagpaparetoke sa katawan at mukha ni Jinkee (salamat kay Vicky ‘hayden’ Belo).

Ang isyu tungkol sa (mga) babaeng naanakan umano ni Manny (kumusta na kaya sila)…

Lahat ng ‘tsismis’ at kontrobersiya laban kay Pacman ay muling nagbangon dahil sa padalos-dalos at tila hindi nag-iisip na pagsagot ng pambansang kamao.

Ngayon ay magkakaroon ng realisasyon si Pacquiao kung anong klaseng ‘HALIMAW’ ang ‘POLITIKA’ sa bansa.

Kahit nag-apology na siya sa kanyang pahayag at nanindigan na iyon ay galing sa Biblia, sorry but the  the damage has been done…

Pati nanay ay nadamay, ang pamilya at propesyon, at ang kanyang buong pagkatao ay muling nahalukay…

Hindi lang bugbog kundi KNOCKOUT agad ang inabot ni Pacquiao dahil sa kanyang maling pahayag.

Hindi kailangan maging LGBT para maunawaan ang kanilang kalagayan, damdamin at pag-iral sa lipunan.

May kasabihan nga, “Bihisan ka man ng ginto ay tanso ka pa rin!”

Research-research and LGBT immersion din kapag may time Manny boy, ‘wag puro kuwarta at kapangyarihan ang ilagay sa iyong tuktok…

Paganahin mo ang naalog mong utak!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com