Popularidad ni Gerald, ‘di totoong nabawasan

MABUTI naman at naisipang muli ng Star Cinema na igawa ng isang pelikula siGerald Anderson. Matagal na rin namang naghihintay ang kanyang fans ng follow up sa huli niyang pelikula, at maganda rin naman ang resulta niyon.

Iyang si Gerald ay hindi lamang isang sikat na male star, kinikilala iyang isang mahusay na actor at matagal na naman niyang napatunayan iyan. Hindi lang iyan pang matinee idol, sumasabak din naman siya kahit na sa action, pero sa ngayon, isang romcom ulit ang ipinagawa sa kanya, iyan ngang Always Be My Maybe.

Riyan sa pelikulang iyan, hindi lamang basta artista si Gerald, sinusubukan din ang kanyang kakayahan na magdala ng isang baguhang leading lady. Hindi na rin nga siguro masasabing ganoon kabago si Arci Munoz, pero kung iisipin mo talaga, ngayon nga lang masasabing nagkakaroon siya ng ganyang exposure.

Dahil siguro nakita rin naman nila ang potentials ni Arci, kaya hinanapan nila siya ng isang malakas na leading man, at sino pa nga ba sa mga artista nila ang maaari mong maasahan ngayon maliban kay Gerald?

Kung iisipin ninyo, ano nga ba ang sikreto ni Gerald? Marami ang nagsasabi noon na baka mabawasan ang kanyang popularidad dahil may kaguluhan ang kanyang lovelife. Ang tingin nga kasi ng iba ay masyadong playboy si Gerald. Pero on the contrary, mas lalo pa ngang tumataas ang kanyang popularidad, kasi hindi naman ang kanyang personality lamang ang puhunan niya. Magaling naman talaga siyang actor. Kaya ano man ang sabihin ng ibang tao sa kanya, walang epekto iyon dahil ang nangingibabaw ay iyong kanyang talent at gusto siyang mapanood ng mga tao.

HATAWAN – Ed de Leon