Aga, dapat nang magbalik-showbiz

AFTER two years ng pamamahinga, nagbalik na si Richard Gutierrez sa isang malaking project. Nauna riyan, namayani rin si Richard Gomez sa prime time, sayang nga lang at kailangan na naman siyang tumigil dahil pumasok ulit sa politika. Nangyayari iyan dahil after all these years, maliwanag na kailangan pa rin naman natin ng mahuhusay na leading men, iyong mga totoong actor.

Kaya nga marami ang nagsasabi, ang isa pang dapat nilang kumbinsihing magbalik ay si Aga Muhlach. Siguro nga, dahil iyan namang si Aga ay masinop talaga sa buhay, napaghandan na niya nang husto ang kanyang kinabukasan. Maganda naman ang kanyang mga negosyo kaya puwede na nga siya sa pribadong buhay.

Pero nakahihinayang isipin na may isang magaling na actor, na kung magiging aktibo lang muli ay tiyak namang susuportahan pa ng publiko na nariyan lang at walang ginagawa. Nakahihinayang dahil sa ngayon ang daming artistang may hitsura nga, pero kung hindi pa mumurahin ng director maghapon at magdamag ay hindi makaarte.May alam kaming ganyan, nailihim nga lang.

Sana makumbinsi na rin nila ulit si Aga na balikan ang acting. Nakaihinayang kasi talaga eh, may mga mahuhusay na actor na nagpapahinga lang.

HATAWAN – Ed de Leon